DKT ANGELINE MABULA: ZOEZI LA URASIMISHAJI MAKAZI LINA UKOMO WAKE

Mbunge wa Jimbo la Ilemela ambae pia ni Naibu Waziri wa Wizara ya Ardhi, Nyumba na Maendeleo ya Makazi Mhe Dkt Angeline Mabula amewaasa wananchi wake kutumia vizuri fursa ya urasimishaji wa makazi kwa kuwa zoezi hilo lina ukomo.

Rai hiyo ameitoa wakati akizungumza na wananchi wa mtaa wa Buyombe kata ya Kahama ikiwa ni muendelezo wa ziara yake ya kusikiliza kero za wananchi, ushauri, na pongezi kwa shughuli za kimaendeleo zinazotekelezwa na Serikali ya awamu ya Tano chini ya Rais Mhe Dkt John Magufuli ambapo amewataka wananchi hao kumshukuru Mhe Rais kwa kuleta zoezi la urasimishaji wa makazi kupitia wizara ya ardhi hivyo kuwataka kutumia vizuri fursa hiyo kwa kuchangia gharama za urasimishaji na kupata hati miliki kwani zoezi hilo si endelevu litakoma mara baada ya kuzinduliwa kwa mpango kabambe wa matumizi ya ardhi kwa jiji la Mwanza na baada ya hapo wananchi wote watatakiwa kujenga kwa kufuata mpango huo kabambe wa matumizi ya ardhi na si vinginevyo.

‘… Ndugu zangu kwanza tunapaswa kumshukuru Mhe Rais anaewajali wananchi wanyonge, Kupitia Wizara ya Ardhi ameleta zoezi la urasimishaji makazi lakini hatutaki kuitumia vizuri fursa hii, hatutaki kuchangia gharama za urasimishaji, Ndugu zangu tukumbuke kuwa zoezi hili si endelevu lina ukomo, Ukisha zinduliwa tu mpango kabambe wa matumizi ya ardhi (masterplan) hatutakuwa tena na zoezi la urasimishaji wa makazi …’ Aliwaasa wananchi hao.

Kabla ya kuanza kwa ziara hiyo Dkt Angeline Mabula alipata wasaa wa kukutana na uongozi wa chuo kikuu cha Mzumbe katika ofisi za halmashauri ya manispaa ya Ilemela wakiongozwa na makamu mkuu wa chuo Profesa Lugano Gusiluka ambapo Profesa Gusiluka amemshukuru mbunge huyo na manispaa kwa ujumla wake kwa ushirikiano wanaoutoa kwa chuo chake kwanza kwa kutoa eneo la ujenzi wa kampasi ya chuo hicho huko kata ya Sangabuye wilaya ya Ilemela, Na kuongeza kuwa mpaka sasa zoezi la ulipaji fidia limekwisha kamilika na muda si mrefu taratibu nyengine zitafuata kuhakikisha  Kampasi hiyo inakamilika ili kutoa huduma kwa wananchi wa kanda ya Ziwa.

‘ Ilemela ni yetu, tushirikiane kuijenga’

Imetolewa na

Ofisi ya Mbunge

Jimbo la Ilemela

19.12.2018