MAGEREZA MWANZA: SHUKRANI MHE DKT ANGELINE MABULA

Jeshi la magereza mkoa wa Mwanza limempongeza na kumshukuru mbunge wa jimbo la Ilemela Mhe Dkt Angeline Mabula kwa msaada wa matofali aliyoyatoa na kutumika katika ujenzi wa jiko na stoo kwa gereza la wanawake Butimba.

Kauli hiyo ya pongezi iliyoambatana na cheti cha shukrani imetolewa leo na mwakilishi wa mkuu wa gereza la Butimba Afande SSP Edith Edward Mbogo  wakati wa mkutano wa mbunge wa jimbo hilo na wananchi wa mtaa wa Ilalila kata ya Shibula ikiwa ni mwendelezo wa ziara yake ya kusikiliza kero za wananchi, changamoto na ushauri juu ya miradi midogo na mikubwa inayotekelezwa katika eneo lao na nchi kwa ujumla wake ambapo amesema kuwa jeshi la magereza linatambua na kuthamini juhudi kubwa zinazofanywa na Mhe Dkt Angeline Mabula katika kuwaletea wananchi maendeleo na jeshi likiwa sehemu ya jamii litaendelea kuunga mkono juhudi hizo

‘… Jeshi la magereza linatambua juhudi unazozifanya kwa wananchi na Sisi ni sehemu ya wananchi wako, Tunatambua namna unavyotusaidia naomba nichukue fursa hii kukukabidhi zawadi ndogo tuliyoiandaa kwa sababu Angeline Foundation ilitusaidia matofali ya kujenga jiko na stoo kwa gereza la wanawake Butimba …’ Alisema

Aidha Afande Mbogo amewatoa hofu wananchi wa mtaa wa Ilalila kuwa jeshi la magereza limekwishafanya uhakiki wa awali wa eneo la mtaa huo wanalotegemea kulitwaa kwaajili ya ujenzi wa gereza la wilaya ya Ilemela hivyo kuwataka kuendelea kuwa wavumilivu kusubiri hatua zitakazofuata ili baadae waweze kulipwa fidia.

Kwa upande wake Mbunge wa Jimbo la Ilemela Mhe Dkt Angeline Mabula ameshukuru Jeshi hilo kwa kutambua na kuthamini mchango wake  huku akiahidi kuendelea kushirikiana nao kuhakikisha wanawaletea wananchi maendeleo sambamba na kuwaomba kufikisha salamu zake kwa mkuu wa magereza  mkoa wa Mwanza.

Kwa upande wake Diwani wa kata ya Shibula Mhe Swila Dede amemshukuru Mhe Mbunge na kumuomba kuendelea kutatua kero zinazowakabili wananchi wake hasa zile za fidia ya kutwaliwa maeneo yao.

Mkutano huo pia ulihusisha viongozi wa chama tawala (CCM) wa wilaya na kata, wataalamu wa Manispaa ya Ilemela,wakala wa barabara vijijini na mjini TARURA, shirika la umeme TANESCO, shirika la Maji MWAUWASA ambapo kila mwananchi amekuwa akipata nafasi ya kuuliza maswali kwa wataalamu hao, kuhoji, kupongeza, kukosoa, na kushauri juu ya shughuli za kimaendeleo zinazotekelezwa.

‘ Ilemela ni yetu, tushirikiane kuijenga’

Imtolewa na

Ofisi ya Mbunge

Jimbo la Ilemela

18.12.2018

.